បន្ទាយមានជ័យ៖ ផ្លូវ១ខ្សែប្រវែង២.៧០០ម៉ែត្រដែលរងការខូចខាតកាលរដូវវស្សាត្រូវបានអាជ្ញាធរជួលជុលនៅថ្ងៃទី០៤ ខែធ្នូ ឆ្នាំ២០២៥ តាមបណ្តោយផ្លូវភូមិចាន់គីរីឆ្ពោះទៅកាន់ភូមិទួលប្រាសាទ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោក គាត ហ៊ុល អភិបាលក្រុងប៉ោយប៉ែត បានដឹងថា៖ បច្ចុប្បន្នអាជ្ញាធរកំពុងបានធ្វើការជួលជុលផ្លូវបេតុង និងផ្លូវគ្រួសថ្មមិច សម្រួលដល់ការធ្វើដំណើរជូនប្រជាពលរដ្ឋប្រើប្រាស់ឡើងវិញ បន្ទាប់ពីផ្លូវមួយចំនួន ត្រូវបានរងការខូចខាត កាលពីខែវស្សាកន្លងទៅ។
លោកអភិបាលបានបញ្ជាក់ថា៖ ក្រោយពីផ្លូវរងខូចខាតអាជ្ញាធរសង្កាត់ក្រុងកំពុងបានជួសជុលផ្លូវបេតុង ឬផ្លូវគ្រួសថ្មមិចសម្រួលជូនប្រជាពលរដ្ឋប្រើប្រាស់ឡើងវិញ ក្នុងនោះក៏មានការចូលរួមពីសប្បុរសជន បានចូលរួមជាមួយអាជ្ញាធរ កំពុងជួសជុលធ្វើជាបន្តបន្ទាប់ ទៅតាមផ្លូវសំខាន់ៗ ឬផ្លូវខ្លះត្រូវខូចខាតខ្លាំងត្រូវប្រញាប់ជូលជុលដើម្បីឲ្យប្រជាពលរដ្ឋប្រើបា្រស់ឡើងវិញ។
ប្រជាពលរដ្ឋបានឲ្យដឹងថា៖ ផ្លូវមួយខ្សែនេះ ឃើញអាជ្ញាធរតែងតែជួសជុលសម្រួលឲ្យប្រជាពលរដ្ឋប្រើប្រាស់ជាញឹកញាប់ផងដែរ ដោយសារផ្លូវនេះ សំបូររថយន្តធំៗប្រើប្រាស់ច្រើន មានរថយន្តដឹកដី ដឹកស៊ីម៉ង់ត៍ រថយន្តដឹកខ្សាច់ថ្ម និងមានក្រុមហ៊ុនក្រឡុកបេតុងលាយស្រេចច្រើនផងដែរ ស្របពេលដែលក្រុងប៉ោយប៉ែត កំពុងមានការអភិវឌ្ឍន៍យ៉ាងឆាប់រហ័ស៕(ប៊ុន ធឿន)
