មានប្រពន្ធហើយ មានសង្សារទៀត! ខឹងសង្សារឈប់ស្រលាញ់ យកអាខោនប្រពន្ធបង្ហោះជេរ« ពួកមីនៅខេត្តតាកែវសុទ្ធតែសំផឹង» ទម្លាក់កំហុសឲ្យប្រពន្ធ ចុងក្រោយគុក !

កម្លាំងជំនាញនៃស្នងការដ្ឋាននគរបាលខេត្តតាកែវ ឃាត់ខ្លួនបុរសម្នាក់កាន់ហ្វេសប៊ុកអតីតប្រពន្ធឈ្មោះ ស្រី ឡូត បង្ហោះFacebook ជេរប្រមាថ ” ពួកមីនៅខេត្តតាកែវសុទ្ធតែសំផឹង!

(តាកែវ) ៖ នារសៀលថ្ងៃព្រហស្បតិ៍ទី៤ ខែធ្នូ ឆ្នាំ២០២៥ ដោយបានការចង្អុលបង្ហាញដ៏ខ្ពង់ខ្ពស់ពីសំណាក់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម វ៉ី សំណាង អភិបាល និងជាប្រធានគណៈបញ្ជាការឯកភាពរដ្ឋបាលខេត្តតាកែវ ក្រោយផ្ទុះការប្រតិកម្មពីបងប្អូនប្រជាពលរដ្ឋ មន្ត្រីរាជការ អាជ្ញាធរគ្រប់លំដាប់ថ្នាក់ ក្នុងខេត្ត ពាក់ព័ន្ធគណនីហ្វេសប៊ុក ឈ្មោះ ស្រី ឡូត ដែលបានបង្ហោះខ្លឹមសារជេប្រមាថប៉ះពាល់កិត្តិយសស្រ្តីនៅខេត្តតាកែវ។

សូមបញ្ជាក់ជូនករណីនេះ ត្រូវបានកម្លាំងនៃស្នងការដ្ឋាននគរបាលខេត្តតាកែវ ធ្វើការស្រាវជ្រាវ ដោយជំនាញ កំណត់មុខសញ្ញាបានភ្លាមៗ ឈានដល់ការឃាត់ខ្លួនឈ្មោះ មាន សង្ហារ ភេទ ប្រុស អាយុ ២០ឆ្នាំ មុខរបរ កម្មកររោងចក្រផលិតកាបូប នៅចោមចៅរាជធានីភ្នំពេញ។

ចំពោះមូលហេតុនៃការបង្ហោះខ្លឹមសារបែបនេះ ដោយសារឈ្មោះមាន សង្ហារ ខឹងប្រពន្ធរបស់ខ្លួនឈ្មោះ ស្រី ឡូត ដែលបានបំបែកបំបាក់នារីជាសង្សារក្រោយរបស់ខ្លួន ឈ្មោះ អឿន សៀវម៉ី ដែលរស់នៅខេត្តតាកែវ មុខរបរលក់អនឡាញ ក្នុងគោលបំណងទម្លាក់កំហុសឱ្យប្រពន្ធទទួលខុសត្រូវចំពោះមុខច្បាប់ និងខឹងសង្សារថ្មីឈ្មោះ អឿន សៀវម៉ី ដែលបដិសេដឈប់ស្រឡាញ់ខ្លួន។

បច្ចុប្បន្នករណីនេះ កម្លាំងជំនាញបានកសាងសំណុំរឿងបញ្ចូនទៅសាលាដំបូងខេត្ត ដើម្បីចាត់ការតាមនីតិវីធីផងដែរ៕