រាជធានីភ្នំពេញ ៖ ជនសង្ស័យចំនួន០៤នាក់ ធ្វើសកម្មភាពលួចម៉ូតូរបស់ប្រជាពលរដ្ឋយ៉ាងសកម្ម ចំនួន ០២ករណីផ្សេងគ្នា ជាប់ខ្នោះដៃរបស់កម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ។
សមត្ថកិច្ចបានឲ្យដឹងថា ជនសង្ស័យ២នាក់ រួមមាន ៖
១-ឈ្មោះ ជឿន សាវុធ ភេទប្រុស អាយុ៣៣ឆ្នាំ ជនជាតិខ្មែរ
២-ឈ្មោះ ហ៊ុន សុខជាតិ ភេទប្រុស អាយុ២៨ឆ្នាំ ជនជាតិខ្មែរ ពួកគេបានធ្វើសកម្មភាព លួចម៉ូតូ របស់ប្រជាពលរដ្ឋ ) កាលពីថ្ងៃទី០៧ ខែសីហា ឆ្នាំ២០២៦ ត្រង់ចំណុចភូមិ១៦ សង្កាត់ស្រះចក ខណ្ឌដូនពេញ រាជធានីភ្នំពេញ ហើយត្រូវបានកម្លាំងជំនាញ ការិយាល័យព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានធ្វើការឃាត់ខ្លួនបាននៅវេលាម៉ោង ២៣៖៣៦នាទី ថ្ងៃទី០៩ ខែសីហា ឆ្នាំ២០២៦ ត្រង់ចំណុចម្តុំពេទ្យបង្អែកចតុមុខ សង្កាត់ស្រះចក ខណ្ឌដូនពេញ រាជធានីភ្នំពេញ ដកហូតបាន ម៉ូតូ០១គ្រឿង ម៉ាក ស៊ុយស៊ូគីនិច ពណ៌ស-ខៀវ ពាក់ស្លាកលេខកំពង់ស្ពឺ1M-9520។
ចំណែកជនសង្ស័យ២នាក់ទៀតរួមមាន ៖
១-ឈ្មោះ ភន់ ផល ហៅ កណ្ដៀ ភេទប្រុស អាយុ៣៦ឆ្នាំ ជនជាតិខ្មែរ
២-ឈ្មោះ ប៉ឹង តុលា ហៅ តុលា ភេទប្រុស អាយុ២៦ឆ្នាំ ជនជាតិខ្មែរ ពួកគេបានធ្វើសកម្មភាព លួចម៉ូតូរបស់ប្រជាពលរដ្ឋ ក្នុងភូមិសាស្រ្តខណ្ឌពោធិ៍សែនជ័យកាលពីថ្ងៃទី១០ ខែសីហា ឆ្នាំ២០២៦ ត្រង់ចំណុចក្រុមហ៊ុន យូអិនធី ភូមិទួលពង្រ សង្កាត់ចោមចៅទី១ ហើយត្រូវបាន កម្លាំងជំនាញការិយាល័យព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានធ្វើការឃាត់ខ្លួនបាន នៅវេលាម៉ោង០៣:២០នាទី ថ្ងៃទី១២ ខែសីហា ឆ្នាំ២០២៦ ត្រង់ចំណុចផ្លូវលេខ១៥៦ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ដកហូតបាន ម៉ូតូ០១គ្រឿង ម៉ាក ស៊ុយស៊ូគី វីវ៉ា ពណ៌ខ្មៅ ពាក់ស្លាកលេខ ភ្នំពេញ 1AK-5304 ។
សូមបញ្ជាក់ថាការបង្ក្រាបនេះ គឺដោយអនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ លោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋាន និងលោកវរសេនីយ៍ឯក ញ៉ែម វ៉ន នាយការិយាល័យ ផងដែរ ។
បច្ចុប្បន្នកម្លាំងជំនាញនាំជនសង្ស័យខាងលើយកមកនាយកដ្ឋាន ដើម្បីធ្វើការសាកសួរ និងកសាងសំណុំរឿងតាមនីតិវិធីច្បាប់ ៕ នុច
