មណ្ឌលគិរី ៖ កម្លាំងជំនាញការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តមណ្ឌលគិរី សហការជាមួយកម្លាំងប៉ុស្តិ៍នគរបាលរដ្ឋបាលស្រែខ្ទុម និងកម្លាំងជំនាញយុត្ដិធម៌ នៃអធិការដ្ឋានគរបាលស្រុកកែវសីមា បានធ្វេីការស្រាវជ្រាវករណីហិង្សាដោយចេតនា(ធ្វេីឲ្យខូចខាតទ្រព្យសម្បត្តិអ្នកដទៃ) ១ករណី ដែលបង្កឡេីងដោយជនសង្ស័យចំនួន ១១នាក់ ។
ជនសង្ស័យទាំងនេះបានធ្វើសកម្មភាពនៅថ្ងៃ១៩ ខែសីហា ឆ្នាំ២០២៦ វេលាម៉ោង ១៨:៥នាទី នៅចំណុចផ្ទះលក់កាហ្វេមួយកន្លែងស្ថិតក្នុងភូមិឆ្នែង ឃុំស្រែខ្ទុម ស្រុកកែវសីមា ខេត្តមណ្ឌលគិរី។
ក្រោយមកកម្លាំងជំនាញបាន ឈានដល់ការឃាត់ខ្លួនជនសង្ស័យបានចំនួន ៤នាក់។ ដោយឡែកជនសង្ស័យជាជនបង្ក និងបក្ខពួកចំនួន៧នាក់ទៀតបានរត់គេចខ្លួនបាត់ កម្លាំងជំនាញកំពុងស្រាវជ្រាវស្វែងរកចាប់ខ្លួន។
ក្នុងនោះវត្ថុតាងចាប់យកបានរួមមាន៖ ដុំថ្ម ៧ដុំ, កាំបិតផ្គាក់ ១ដើម, ដាវកែច្នៃ ៣ដើម និងទូរស័ព្ទ ៤គ្រឿង។
ការបង្ក្រាបនេះ អនុវត្តន៍តាមអនុសាសន៍ដ៏ខ្ពង់ខ្ពស់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ, និងឯកឧត្តមប្រធានគណៈបញ្ជាការឯកភាពរដ្ឋបាលខេត្តមណ្ឌលគិរី, ក្រោយពីបានទទួលពាក្យបណ្ដឹងរបស់ជនរងគ្រោះ និងដោយមានការចង្អុលបង្ហាញពីលោកឧត្តមសេនីយ៍ត្រី ជា ចិត្រា ស្នងការ នៃស្នងការដ្ឋាននគរបាលខេត្តមណ្ឌលគិរី សម្របសម្រួលនីតិវិធីពីលោក ស៊ាវ ងីឈាន់ ព្រះរាជ្ញារងអមសាលាដំបូងខេត្តមណ្ឌលគិរី ផងដែរ ។
បច្ចុប្បន្នជនសង្ស័យទាំង៤នាក់រួមនឹងវត្ថុតាង កម្លាំងការិយាល័យជំនាញ កំពុងកសាងសំណុំរឿងបញ្ជូនទៅសាលាដំបូងខេត្តមណ្ឌលគិរី ចាត់ការបន្តតាមនីតិវិធីច្បាប់៕
