បន្ទាយមានជ័យ៖ កម្លាំងកងរាជអាវុធហត្ថឃាត់ខ្លួនជនសង្ស័យម្នាក់ ដែលទទួលទិញផលចោកម្មម៉ូតូដុះដូរកាប់សាច់លក់ត្រូវបានបញ្ជូនទៅសាលាដំបូងខេត្តបន្ទាយមានជ័យនៅថ្ងៃទី២៥ ខែសីហា ឆ្នាំ២០២៦។
លោកអនុសេនីយ៍ឯក តិល តៃលីវ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់ថា៖ជនសង្ស័យមានឈ្មោះ គឹម នី ភេទប្រុសអាយុ៤៦ឆ្នាំ(ម្ចាស់ទីតាំងទិញលក់)រស់នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត។
លោកបានបញ្ជាក់ថា៖នៅពេលឃាត់ខ្លួនជនសង្ស័យគឺកម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានទទួលបណ្តឹងជាច្រើនករណីដែលមានជនសង្ស័យធ្វើសកម្មភាពកាប់ប្លន់យកម៉ូតូនិងលួចម៉ូតូហើយកម្លាំងបានធ្វើការស្រាវជ្រាវសហការជាមួយអាជ្ញាធរមូលដ្ឋានបានចុះប្រតិបត្តិការបង្ក្រាបឃាត់ខ្លួនជនសង្ស័យចំនួន១នាក់និងរឹបអូសម៉ូតូ៤គ្រឿងនិងសម្ភារៈបន្លាសម៉ូតូជាច្រើនបំណែកដែលឃាត់កាលពីថ្ងៃទី២២ ខែសីហា ឆ្នាំ២០២៦នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត។
លោកវរៈសេនីយ៍ត្រី គង់ រិទ្ធា មន្ត្រីនគរបាលយុត្តិធម៌អង្គភាពកងរាជអាវុធហត្ថក្រុងប៉ោយប៉ែតបានបញ្ជាក់ថា៖ក្រោយឃាត់ខ្លួនជនសង្ស័យម្នាក់និងរឹបអូសវត្ថុតាងមានម៉ូតូនិងសម្ភារៈមួយចំនួនត្រូវបានចោទប្រកាន់ពីបទទិញផលចោកម្មត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យដើម្បីចាត់ការតាមច្បាប់៕(ប៊ុន ធឿន)
