ទើបធ្វើតេស្តជាប់ នារី២នាក់ជិះម៉ូតូឌុបគ្នាទៅធ្វើការរោងចក្រ ត្រូវរថយន្តបុកស្លាប់ទាំង២នាក់លើផ្លូវជាតិលេខ១

ខេត្តស្វាយរៀង៖ រន្ធត់ទាំងព្រឹក ខណៈនារី២នាក់ ជិះម៉ូតូឌុបគ្នាទៅធ្វើការរោងចក្រ ជួបគ្រោះថ្នាក់ចរាចរណ៍ស្លាប់ទាំង២នាក់យ៉ាងរន្ធត់បំផុត ។

ហេតុការណ៍នេះបានកើតឡើងកាលពីវេលាម៉ោង ជាង៦ព្រឹកថ្ងៃទី ២៣ ខែតុលា ឆ្នាំ២០២៥ ស្ថិតតាមបណ្ដោយផ្លូវជាតិលេខ១អត់នៅក្នុងភូមិព្នៅ ឃុំតាសួស ស្រុកស្វាយជ្រំខេត្តស្វាយរៀង។

តាមប្រភពពព័ត៌មានបានឲ្យដឹងថា នារីទាំង២នាក់នេះ បានជិះម៉ូតូចេញពីផ្ទះទាំងព្រឹកព្រលឹម ដើម្បីទៅធ្វើការរោងចក្រ បន្ទាប់ពីបានធ្វើតេសជាប់ ហើយថៅកែរោងចក្រឲ្យទៅត្រូវស្គេនមេដៃ ដើម្បីចូលធ្វើការ តែជាអកុសលមកតាមផ្លូវ ក៏ជួបគ្រោះថ្នាក់ចរាចរណ៍ ត្រូវរថយន្តបុកស្លាប់ទាំងព្រឹក បែបនេះតែម្តង ទុកឲ្យក្រុមគ្រួសារទ្រហ៊ោយំបោកខ្លួនយ៉ាងខ្លាំង ។

ក្រោយកើតហេតុ សាកសពនារីទាំង២នាក់ត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី រីឯវត្ថុតាងរថយន្តនិងម៉ូតូត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកស្វាយជ្រំ ដើម្បីរង់ចាំការដោះស្រាយនៅពេលក្រោយ ៕