ខេត្តបន្ទាយមានជ័យ ៖ មានការភ្ញាក់ផ្អើលខ្លាំងមួយបានកើតឡើង ដោយប្រជាពលរដ្ឋ បានប្រទះឃើញសាកសពបុរស ម្នាក់ត្រូវបានគេច្រកក្នុងវ៉ាលី កប់ក្នុងដីមួយកន្លែង មិនដឹងតាំងពីពេលណា ។
ករណីឃាតកម្មសម្លាប់ញាត់វ៉ាលី កប់ក្នុងដីនេះ បានកើតឡើងនៅរសៀលថ្ងៃទី៥ ខែធ្នូ ឆ្នាំ២០២៥ ឋិតក្នុងភូមិសាស្ត្រភូមិព្រៃគប់ សង្កាត់អូរឬស្សី ក្រុងប៉ោយប៉ែត ខេត្តបន្ទាយមានជ័យ។
តាមប្រភពពីពលរដ្ឋ បឋម បានឲ្យដឹងថា គាត់ធំក្លិនស្អុយខ្លាំង រាល់ពេលជិះកាត់ទីនេះម្តងៗ ដោយស្អុយចេញពីក្នុងព្រៃ លុះទ្រាំមិនបានចូលទៅមើល ក៏ឃើញវ៉ាលីមួយកប់ក្នុងដី សង្ស័យមានសពមនុស្សនៅក្នុង ក៏ប្រញាប់រាយការណ៍ជូនសមត្ថកិច្ចតែម្តង ។
ភ្លាមៗ គេឃើញមានកម្លាំងចម្រុះបានចុះមកហ៊ុំព័ទ្ធខ្សែនៅទីតាំងកើតហេតុ យកវ៉ាលីនោះឡើងលើ និងបើកវ៉ាលីនេះពិនិត្យសព ដោយដឹងថា ជាសពមនុស្សប្រុស មិនទាន់ស្គាល់អត្តសញ្ញាណនៅឡើយទេ កំពុងធ្វើការបន្ត ។
ជុំវិញករណីខាងលើ អង្គភាពសារព័ត៌មានTVFB បានព្យាយាមទាក់ទងសួរព័ត៌មានទៅកាន់សមត្ថកិច្ច តែមិនអាចទាក់ទងបាន៕
