រាជធានីភ្នំពេញ ៖ ពិតជារន្ធត់ណាស់លោកអើយ ស្ត្រីម្នាក់ខ្ទេចជើងមួយចំហៀងម៉ត់ មើលលែងយល់ ខណៈជួបគ្រោះថ្នាក់ចរាចរណ៍ចាប់ហ្វ្រាំងម៉ូតូដួល ចូលក្រោមរថយន្តកិនអូសជាច្រើនម៉ែត្រតែម្តង ។
ហេតុការណ៍នេះបានកើតឡើងនៅវេលាម៉ោង ១៧:៣០នាទី ថ្ងៃទី១២ ខែមករា ឆ្នាំ២០២៦ ចំណុចលើផ្លូវបេតុង ស្ថិតក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
សមត្ថកិច្ចបានឲ្យដឹងថា បើតាមប្រភពព័ត៌មាន មុនពេលកើតហេតុ គេបានឃើញស្ត្រីម្នាក់ ឈ្មោះ សុខ រ៉ាន់ ភេទស្រី អាយុ៤៩ឆ្នាំមុខរបរនៅផ្ទះ មានទីលំនៅ ភូមិព្រៃវែង សង្កាត់ព្រៃវែង ខណ្ឌដង្កោ ជិះម៉ូតូមួយគ្រឿង ក្នុងទិសដៅពីត្បូងទៅជើង ស្របទិសគ្នា ជាមួយនឹងរថយន្តម៉ាកHYUND ពណ៌លឿង ផ្លាកលេខ ភ្នំពេញ3D-6550 ដែលបើកបរដោយបុរសម្នាក់ មិនស្គាល់អត្តសញ្ញាណព្រោះបានគេចខ្លួនបាត់។ ដោយពេលមកដល់ចំណុចកើតហេតុ ម៉ូតូបាន ចាប់ហ្វ្រាំងរអិលដួលចូលក្រោមរថយន្តបណ្ដាលឱ្យកិនអូសជាច្រើនម៉ែត្រ ខ្ទេចជើងមួយចំហៀងម៉ត់ មើលលែងយល់តែម្តង ភ្លាមៗត្រូវបានអ្នកសារព័ត៌មាន ទាក់ទងហៅរថយន្តសាមុយ មកដឹកបញ្ជូនស្ត្រីរងគ្រោះទៅសង្គ្រោះបន្ទាន់នៅមន្ទីរពេទ្យខ្មែរសូវៀត ។ ខណៈករណីនេះសមត្ថកិច្ចបញ្ជាក់ថា បណ្តាលមកពីភាគីម៉ូតូបើកបរខ្វះការប្រុងប្រយ័ត្ន ។
ក្រោយកើតហេតុ សមត្ថកិច្ចបានធ្វើការវាស់វែង យករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយគ្នាពេលក្រោយតាមច្បាប់បន្តទៀត ៕ នុច
