រន្ធត់! រថយន្តដឹកស៊ីម៉ង់ត៍ បុករះស្លាប់និងរបួសជាច្រើននាក់នៅតាមឆ្នេរ រណូករណែល ខ្ទេចទាំងអាស្រមលោកយាយម៉ៅទៀត

ខេត្តព្រះសីហនុ៖ រន្ធត់ណាស់ ខ្ទេចរណូករណែល ក្នុងហេតុការណ៍គ្រោះថ្នាក់ចរាចរណ៍ រថយន្តដឹកស៊ីម៉ង់ត៍ រាប់សិបតោន ចុះពីស្ពាន បុករះរថយន្ត១គ្រឿងម៉ូតូនិងកង់ប្រមាណ ៤ គ្រឿង ស្លាប់បុរស២នាក់ខ្ទេចខ្លួន មើលស្ទើរមិនយល់ និងប្រុសស្រី៤នាក់ទៀតរងរបួសធ្ងន់ស្រាល ថែមទាំងខ្ទេចអាស្រមលោកយាយម៉ៅមួយថែមទៀត ។

ហេតុការណ៍នេះបានកើតឡើង នៅវេលាម៉ោង៣ និង ៤០នាទីរសៀលថ្ងៃទី១២ ខែមករា ឆ្នាំ២០២៦ នៅចំណុចស្ពានអូរត្រជាក់ នាចុងឆ្នេរអូរត្រេះព្រំប្រទល់ក្រុងព្រះសីហនុ និង ក្រុងកំពង់សោម ខេត្តព្រះសីហនុ ។

ប្រភពពីកន្លែងកើតហេតុបានឲ្យដឹងថា នៅមុនពេលកើតហេតុខ្លួនកំពុង អង្គុយលក់ដូរលើរទះនៅក្បែរកន្លែងកើតហេតុសុខៗស្រាប់តែ ឃើញមានរថយន្ត១ស៊ីទែន ដឹកស៊ីម៉ង់ត៍១គ្រឿង ពណ៌ស មិនស្គាល់ម៉ាក ពាក់ស្លាកលេខ ភ្នំពេញ 4A-2578 បើកបរដោយបុរសម្នាក់ ក្នុងទិសដៅពីឆ្នេរអូរត្រេះ ទៅឆ្នេរអូរឈើទាល ។ លុះមកដល់ចំណុចកើត ហេតុចុះពីស្ពានអូរត្រជាក់ចិត្តផ្លូវកោង ក្នុងល្បឿនលឿនដូចហោះ បួងចង្កូតមិនទាន់ និង មិនកោងតាមផ្លូវ ហោះជ្រុលទៅបុករះនិងរថយន្តព្រុស១គ្រឿង ពណ៌ទឹកមាស ពាក់ស្លាកលេខ ភ្នំពេញ 2BW-8904 និង ម៉ូតូ៣គ្រឿងទៀត មានម៉ាក Scopy ១គ្រឿង និង HongDaDream ២គ្រឿងទៀតបែកខ្ទេចសាច់គ្មានសល់ និងបង្គោលភ្លើងបំភ្លឺផ្លូវ១ដើម កង់ ១គ្រឿង ហើយនិងអាស្រមលោកយាយម៉ៅមួយនិង រូបសំណាក់លោកយាយមួយបាក់ខូចខាតអស់ ។

សូមបញ្ជាក់ថា ករណីនេះ បណ្តាលឲ្យបុរសម្នាក់អ្នកលក់នៅឆ្នេរស្លាប់ និង បុរសម្នាក់ទៀតស្លាប់ ពុំទាន់ស្គាល់អត្តសញ្ញាណ និង បុរសស្ត្រី៤នាក់ទៀតរងរបួសធ្ងន់ស្រាលមានអ្នកជិះកង់ហាត់ប្រាណ និងអ្នកលក់នៅឆ្នេរ ត្រូវបានបញ្ជូនយកទៅសង្គ្រោះបន្ទាន់នៅមន្ទីរពេទ្យបង្អែកខេត្តព្រះសីហនុ ចំនួន២រថយន្ត ។

បច្ចុប្បន្ន សមត្ថកិច្ចបានវាស់វែងស្ទួចយកវត្ថុតាងទាំង អស់ទៅរក្សាទុក ដើម្បីដោះស្រាយនិងអនុវត្តទៅតាមនីតិវិធី។ ចំពោះសពត្រូវបានប្រគល់ជូនសាច់ញ្ញាតិដែលមកទទួលយកទៅធ្វើបុណ្យតាមប្រពៃណី ៕