(ឧត្តរមានជ័យ)៖ លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា បានប្រកាសឱ្យដឹងថា នៅព្រឹកថ្ងៃអាទិត្យ ទី២៩ ខែមីនា ឆ្នាំ២០២៦នេះ ក្រុមសម្របសម្រួល (CLG) របស់កម្ពុជា បានសម្របសម្រួលដល់ក្រុមអ្នកសង្កេតការណ៍អាស៊ាន (AOT) ក្នុងការចុះសង្កេតការណ៍ និងផ្ទៀងផ្ទាត់ស្ថានភាពជាក់ស្តែងនៅតំបន់ព្រំដែន។
បេសកកម្មនេះ បានធ្វើឡើងនៅវេលាម៉ោង ៩:៣៣នាទីព្រឹក ស្ថិតក្នុងតំបន់ច្រកអូរស្មាច់ ក្រុងសំរោង ខេត្តឧត្តរមានជ័យ។ គោលបំណងសំខាន់នៃការចុះសង្កេតការណ៍នេះ គឺដើម្បីផ្ទៀងផ្ទាត់ និងរាយការណ៍អំពីស្ថានភាពព្រំដែន ក៏ដូចជាពិនិត្យលើការគោរព និងការអនុវត្តវិធានការនានាដែលបានចែងក្នុងសេចក្តីប្រកាសរួម ក្រោយពេលបទឈប់បាញ់បានចូលជាធរមាន។
បើតាមអ្នកនាំពាក្យក្រសួងការពារជាតិ ការចុះបំពេញភារកិច្ចលើកនេះ ក៏ជាផ្នែកមួយនៃយន្តការផ្លាស់ប្តូរវេនដឹកនាំរបស់ក្រុមអ្នកសង្កេតការណ៍ផងដែរ។ ក្នុងនោះ អាណត្តិដឹកនាំរបស់ប្រទេសម៉ាឡេស៊ីត្រូវបានបញ្ចប់ ហើយត្រូវផ្ទេរភារកិច្ចបន្តជូនទៅប្រទេសហ្វីលីពីន ក្នុងនាមជាប្រធានអាស៊ានប្តូរវេន និងជាប្រធានដឹកនាំក្រុមអ្នកសង្កេតការណ៍អាស៊ាន (AOT) ប្រចាំនៅព្រះរាជាណាចក្រកម្ពុជា។
ក្នុងឱកាសនេះដែរ រាជរដ្ឋាភិបាល និងក្រសួងការពារជាតិកម្ពុជា បានបញ្ជាក់សារជាថ្មីនូវជំហរយ៉ាងម៉ឺងម៉ាត់ និងការប្តេជ្ញាចិត្តប្រកបដោយការទទួលខុសត្រូវខ្ពស់ ក្នុងការអនុវត្តឱ្យបានខ្ជាប់ខ្ជួនបំផុតនូវរាល់កិច្ចព្រមព្រៀងសន្តិភាពដែលបានសម្រេចកន្លងមក រួមមាន៖ ១. សេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី២៧ ខែធ្នូ ឆ្នាំ២០២៥។ ២. សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ កាលពីថ្ងៃទី២៦ ខែតុលា ឆ្នាំ២០២៥។
កម្ពុជាបានបង្ហាញនូវឆន្ទៈមោះមុតក្នុងការស្ដារស្ថានភាពឱ្យវិលត្រឡប់ទៅរកភាពប្រក្រតីវិញក្នុងពេលឆាប់ៗ ដើម្បីធានាបាននូវសន្តិភាព ស្ថិរភាព និងការអភិវឌ្ឍយូរអង្វែងនៅតាមបណ្តោយព្រំដែននៃប្រទេសទាំងពីរ៕
