ករណីសម្លាប់បុរសម្នាក់ច្រកបាវយកមកបោះចោលនៅសណ្តរស្ទឹងព្រែកត្នោត ក្មេងម្នាក់ឃើញហេតុការណ៍ផ្ទាល់ភ្នែក មានឡានដឹកសាំងមកឈប់ រួចបុរស២នាក់សែងបាវនេះបោះចោល …..
ភ្នំពេញ៖ កាលពីម្សិលមិញ មានការភ្ញាក់ផ្អើលខ្លាំងទាំងកណ្តាលថ្ងៃត្រង់ ខណៈប្រជាពលរដ្ឋជាអ្នកដំណើរបានប្រទះឃើញសពមនុស្ស ត្រូវបានឃាតករ សម្លាប់ច្រកចូលក្នុងប៉ាវ យកមកបោះចោលនៅសណ្តរស្ទឹងព្រែកត្នោត រហូតហើមស្អុយ រហែកបាវទៅហើយ ក៏ប្រញាប់រាយការណ៍ជូនសមត្ថកិច្ចចុះមកធ្វើការពិនិត្យ ។
ហេតុការណ៍នេះបានកើតឡើងនៅម៉ោង ៩:៣០ នាទី ថ្ងៃទី២១ ខែតុលា ឆ្នាំ២០២៥ ចំណុចចិញ្ចើមផ្លូវលំ ជាប់របងដី ឡូតិ៍ទុកចោល ភូមិគងនយ សង្កាត់គងនយ ខណ្ឌដង្កោ រាជធានីភ្នំពេញ ។
ក្រោយទទួលព័ត៌មានភ្លាម កម្លាំងជំនាញចុះអន្តរាគមន៍ដល់កន្លែងកើតហេតុ ធ្វើការហ៊ុមព័ទ្ធ និងរង់ចាំធ្វើកោសល្យវិច័យ មានទាំងនគរបាលប៉ុស្តិ៍ នគរបាលខណ្ឌ និងនគរបាលជំនាញផ្នែកកោសល្យវិច័យនៃស្នងការដ្ឋាននគរបាលរាជធានីភ្នំពេញ ។
យោងតាមការបំភ្លឺពីក្មេងប្រុសអាយុ១២ឆ្នាំម្នាក់ មានផ្ទះនៅក្បែរកន្លែងកើតហេតុ បានឲ្យដឹងថា នៅវេលាម៉ោងប្រហែល០៨:០០នាទី ថ្ងៃទី២០ ខែតុលា ឆ្នាំ២០២៥ ខ្លួនកំពុងអង្គុយលេងនៅក្រោមផ្ទះ ពេលនោះស្រាប់តែជីតា ឲ្យខ្លួនឡើងទៅមើលនៅផ្លូវពីខាងមុខផ្ទះឃើញមានរថយន្តដឹកលាមកមកមែន ហើយខ្លួនក៏រត់ឡើងទៅ មើលឃើញមានរថយន្តដឹកសាំងគ្រឿងធុងស៊ីទែនខាងក្រោយពណ៌ក្រហមចតនៅចិញ្ចើមផ្លូវ និង មានមនុស្សប្រុសចំនួន២នាក់បានសែងបាវពណ៌ក្រហមចេញពីក្នុងរថយន្តបោះចោលទៅដីព្រៃ ចិញ្ចើមផ្លូវ រួចក៏នាំគ្នាឡើងជិះរថយន្តបើកចេញទៅទិសខាងកើតបាត់ ខ្លួនក៏ចូលទៅក្នុងផ្ទះវិញ ។ លុះនៅព្រឹកថ្ងៃទី២១ ខែតុលា ឆ្នាំ២០២៥ ស្រាប់តែមានមនុស្សផ្អើលឆោឡោថាមានសាកសព ច្រកក្នុងបាវ ខ្លួនក៏បានទៅមើលទើបដឹងថាបាវនោះជាបាវច្រកសាកសព ។ នៅក្នុងកាបូបថង់ កៅស៊ូនោះ មានសាកសពមនុស្សប្រុសម្នាក់ច្រកនៅក្នុង បាវពណ៌ក្រហមឆ្នូតពណ៌ស មាត់បាវក្របួច បិទមានចំណងខ្សែភ្លើងពណ៌ប្រផេះចងសំលាប់មុខ ផ្ទៃបាវមានស្នាមដាច់រហែក (ត្រូវបានសមត្ថកិច្ចហែកដាច់) ហើយសាកសពត្រូវបានច្រកបាវមួយទៀតពណ៌ស មានអក្សរឆ្មាព្រំអង្ករបាត់ដំបង ទម្ងន់50Kg ច្រកចាប់ពីក្បាលរហូតដល់ចង្កេះ ដៃទាំងសងខាងបត់មកមុខនៅខាងបាវ ហើយនៅ ក្នុងបាវជាមួយសពនេះមានកាបូបស្ពាយ១ពណ៌ខ្មៅ អាវដៃវែង១ពណ៌ខ្មៅម៉ាកZARA អាវរងាដៃ វែង១ពណ៌ប្រផេះ ខោជើងវែង១ពណ៌ខ្មៅជើងខោទាំងសងចងសំលាប់មុខចូលគ្នា និងភួយ១ ពណ៌ក្រហម ។
តាមការធ្វើកោសល្យវិច័យ គ្រូពេទ្យសន្និដ្ឋានថា ជាករណីឃាតកម្ម វាយនឹងវត្ថុរឹង ត្រូវក្បាល ជាករណីឃាតកម្ម វាយសម្លាប់រួចច្រកសាកសពចូលបាវយកមកបោះចោល ។
ទោះបីជាយ៉ាងណា ពេលនេះសមត្ថកិច្ចជំនាញ កំពុងតាមចាប់ជនដៃដល់យកមកផ្តន្ទាទោសតាមច្បាប់ ខណៈសមត្ថកិច្ចបញ្ជាក់ថា សពខាងលើជាសពមនុស្សប្រុស និងជាខ្មែរ មិនមែនជាបរទេសនោះទេ តែមិនទាន់ស្គាល់អត្តសញ្ញាណនៅឡើយទេ កំពុងស្រាវជ្រាវបន្ត ៕ នុច
