អាជ្ញាធរចុះបង្ក្រាបទីតាំង Online Scames នៅអគារ PRINCE HUAN YU ក្នុងខណ្ឌចំការមនឃាត់ខ្លួនបានជាច្រើននាក់
(ភ្នំពេញ)៖ ការប្ដេជ្ញាចិត្តយ៉ាងម៉ឺងម៉ាត់របស់រាជរដ្ឋាភិបាលកម្ពុជាក្នុងការបង្ក្រាបបទល្មើសបោកប្រាស់តាមប្រព័ន្ធអនឡាញ (Online Scams) បាននិងកំពុងក្លាយជាការងារដ៏សំខាន់មួយ ដើម្បីការពារសន្តិសុខឌីជីថល និងរក្សាជំនឿទុកចិត្តរបស់អ្នកវិនិយោគអន្តរជាតិ។
តាមរយៈការរឹតបន្តឹងច្បាប់ ការបង្កើនកិច្ចសហការយ៉ាងស្អិតល្មួតជាមួយអាជ្ញាធរអន្តរជាតិ និងការបើកប្រតិបត្តិការចុះបង្ក្រាបទីតាំងសង្ស័យជាបន្តបន្ទាប់ អាជ្ញាធរមានសមត្ថកិច្ចបានបង្ហាញពីជំហរឥតងាករេក្នុងការលុបបំបាត់រាល់ទម្រង់នៃឧក្រិដ្ឋកម្មបច្ចេកវិទ្យាទាំងនេះ ទោះបីជាត្រូវប្រឈមមុខនឹងល្បិចកលកាន់តែស្មុគស្មាញរបស់ក្រុមឧក្រិដ្ឋជនក៏ដោយ។
តួយ៉ាង គណ:បញ្ជាការឯកភាពខណ្ឌចំការមន ដោយមានការសម្របសម្រួលពីលោក ទុង រតនា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ដឹកនាំលោក កៀង ល័ក្ស អភិបាលខណ្ឌចំការមន នៅថ្ងៃទី២៧ ខែកក្កដា បានចុះបង្ក្រាបទីតាំង Online Scames នៅអគារ PRINCE HUAN YU (ព្រីនស៍ ហួន យូ) ផ្លូវបើកថ្មី ភូមិ១៥ សង្កាត់ទន្លេបាសាក់។
កម្លាំងចម្រុះបានរកឃើញមនុស្សបម្រើការងារ និងសម្ភារមួយចំនួន៖
* អគារA1
ជាន់ទី១៥ បន្ទប់លេខ ១៥-៣៣ រកឃើញមនុស្ស ១៦នាក់ ស្រី ០១នាក់ ជនជាតិវៀតណាម។ សម្ភារៈរួមមាន កុំព្យូទ័រយួរដៃ ចំនួន ១០គ្រឿង ទូរស័ព្ទដៃ ចំនួន ៣១គ្រឿង All in one ចំនួន ០៨គ្រឿង ដុំwifi ចំនួន ០១គ្រឿង។
ជាន់ទី១៦ បន្ទប់លេខ ១៦-៣៥ រកឃើញមនុស្ស ១១នាក់ ស្រី ០១នាក់ ជនជាតិវៀតណាម។ សម្ភារៈរួមមាន កុំព្យូទ័រយួរដៃ ចំនួន ១៣គ្រឿង ទូរស័ព្ទដៃ ចំនួន ៤៤គ្រឿង ដុំwifi ចំនួន ០១គ្រឿង។
ជាន់ទី១៧ បន្ទប់លេខ ១៧-៣៦ រកឃើញមនុស្ស ១៥នាក់ ស្រី ០៣នាក់ ជនជាតិវៀតណាម។ សម្ភារៈរួមមាន កុំព្យូទ័រយួរដៃ ចំនួន ២១គ្រឿង ទូរស័ព្ទដៃ ចំនួន ៥៨គ្រឿង ដុំwifi ចំនួន ០១គ្រឿង។
ជាន់ទី១៩ បន្ទប់លេខ ១៩-១៥ រកឃើញមនុស្ស ១០នាក់ ស្រី ០២នាក់ ជនជាតិវៀតណាម។ សម្ភារៈរួមមាន កុំព្យូទ័រយួរដៃ ចំនួន ១០គ្រឿង ទូរស័ព្ទដៃ ចំនួន ២៧គ្រឿង ដុំwifi ចំនួន ០១គ្រឿង។
* អគារA2
ជាន់ទី០៧ បន្ទប់លេខ ០៧-១១ មិនមានមនុស្ស ។ សម្ភារៈរួមមាន កុំព្យូទ័រយួរដៃ ចំនួន ០៨គ្រឿង ទូរស័ព្ទដៃ ចំនួន ៣០គ្រឿង ដុំwifi ចំនួន ០១គ្រឿង។
ជាន់ទី០៧ បន្ទប់លេខ ០៧-២៥ មិនមានមនុស្ស ។ សម្ភារៈរួមមាន កុំព្យូទ័រយួរដៃ ចំនួន ០៧គ្រឿង ទូរស័ព្ទដៃ ចំនួន ១៩គ្រឿង ដុំwifi ចំនួន ០១គ្រឿង។
សរុបរួមមាន ទូរស័ព្ទដៃចំនួន ២០៩គ្រឿង កុំព្យូទ័រយួរដៃចំនួន ៦៩គ្រឿង All in One ចំនួន ០៨គ្រឿង ដុំwifi ចំនួន ០៦គ្រឿង។
យោងតាមលទ្ធផលកោសល្យវិច័យ ជនសង្ស័យខាងលើប្រើប្រាស់ប្រទេសកម្ពុជាប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា(OnlineScams) ក្រោមរូបភាពអូសទាញលួងលោមស្នេហា Romances Scams ដែលមានគោលដៅទៅប្រទេសវៀតណាម ។
ក្នុងនោះមាន ជនបរទេសសរុប ចំនួន ៥៤នាក់ ស្រី ០៧នាក់ ០២សញ្ជាតិ (គ្មានលិខិតឆ្លងដែន ១៤នាក់ ស្រី០១នាក់) ជនជាតិវៀតណាម ៥២នាក់ ស្រី ០៧នាក់ (គ្មានលិខិតឆ្លងដែន ១២នាក់ ស្រី០១នាក់) ជនជាតិចិន ០២នាក់ ប្រុស (គ្មានលិខិតឆ្លងដែន)៕
