សម្តេចតេជោ ហ៊ុន សែន ៖ បទពិសោធន៍ជាង ៤៧ឆ្នាំ ធ្វើឱ្យខ្ញុំស្គាល់ស្ទើរគ្រប់រសជាតិនៃបញ្ហាជាតិ និងអន្តរជាតិ

ភ្នំពេញ៖ យោងតាមការចេញផ្សាយរបស់ក្រសួងព័ត៌មាន បានឲ្យដឹងថា នៅព្រឹកថ្ងៃពុធ ទី១៤ ខែមករា ឆ្នាំ២០២៦ នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា បានបង្ហោះសារលើបណ្តាញសង្គម រំលឹកពីខួបលើកទី៤១ឆ្នាំ នៃការចូលកាន់តំណែងជានាយករដ្ឋមន្ត្រីរបស់សម្តេច (១៤ មករា ១៩៨៥ – ១៤ មករា ២០២៦)។

សម្តេចតេជោ បានមានប្រសាសន៍ថា សម្តេចស្ទើរតែភ្លេចនូវថ្ងៃដ៏សំខាន់នេះទៅហើយ។ សម្តេចបានរំលឹកថា នៅពេលដែលសម្តេចចូលកាន់តំណែងជានាយករដ្ឋមន្ត្រីដំបូងនៅថ្ងៃទី១៤ ខែមករា ឆ្នាំ១៩៨៥ សម្តេចមានវ័យត្រឹមតែ ៣២ឆ្នាំប៉ុណ្ណោះ ដែលធ្វើឱ្យសម្តេចក្លាយជានាយករដ្ឋមន្ត្រីដែលក្មេងជាងគេបំផុតក្នុងពិភពលោកនាពេលនោះ។

សម្តេចតេជោ ក៏បានរំលឹកពីប្រវត្តិការងារមុនឈានដល់តំណែងកំពូលនេះថា សម្តេចធ្លាប់ជារដ្ឋមន្ត្រីក្រសួងការបរទេសនៅខែមករា ឆ្នាំ១៩៧៩ ក្នុងវ័យ ២៧ឆ្នាំ និងជាឧបនាយករដ្ឋមន្ត្រី រដ្ឋមន្ត្រីក្រសួងការបរទេស នៅខែមិថុនា ឆ្នាំ១៩៨១ ក្នុងវ័យ ២៩ឆ្នាំ។

សម្តេចតេជោ ហ៊ុន សែន បានគូសបញ្ជាក់បន្ថែមថា បើគិតមកដល់ពេលនេះ សម្តេចបានបំពេញការងារក្នុងរដ្ឋាភិបាលអស់រយៈពេលជាង ៤៤ឆ្នាំ និងនៅស្ថាប័នព្រឹទ្ធសភាជិត ៣ឆ្នាំ ដែលសរុបពេលវេលាបម្រើជាតិមានជាង ៤៧ឆ្នាំ។

សម្តេចបានសង្កត់ធ្ងន់ថា តាមរយៈបទពិសោធន៍ដ៏យូរឆ្នាំនេះ បានធ្វើឱ្យសម្តេចស្គាល់ស្ទើរគ្រប់រសជាតិនៃបញ្ហារបស់ជាតិ និងប្រជាជន ក៏ដូចជាការយល់ដឹងស៊ីជម្រៅអំពីបញ្ហាតំបន់ និងអន្តរជាតិផងដែរ៕